التضخم الحميد للبروستاتا

زي ما وضحنا قبل كدا البروستاتا شبه البرتقالة في تكوينها، ليها قشرة خارجية وفصوص ومجرى البول بيمر في محورها المركزي بين الفصوص.. فصوص البرتقالة هي لب الغدة اللي بتكون فيها الخلايا الغدية والعضلية والنسيج الضام، واللب ده هو اللي مسؤول عن وظيفة الغدة.. في التضخم الحميد للبروستاتا BPH أعداد الخلايا في لب البروستاتا (سواء الغدية أو العضلية) بتزيد بشكل كبير لدرجة إن اللب ده بيتضخم.. الخلايا الجديدة بتكون خلايا طبيعية مش سرطانية وعلشان كدا بمسميه التضخم الحميد.. المحور المركزي للبروستاتا بيعدي فيه مجرى البول اللي هو عبارة عن انبوبة مجوفة ليها جدار مكون من نسيج طلائي مرن، وبالتالي المحور ده بيمثل نقطة مقاومة أضعف من القشرة الخارجية اللي مكونة من نسيج ليفي كثيف.. عشان كدا تضخم لب البروستاتا (فصوص البرتقالة) بيكون للداخل في الأول والفصوص المتضخمة بتضغط على مجرى البول وتسبب ضيق وانسداد مع تطور التضخم قبل حتى ما التضخم يظهر على الغدة من برا ويزود حجمها.. التضخم الحميد للبروستاتا ممكن يتصنف حسب نوع الخلايا اللي بيزيد عددها، فممكن يكون التضخم شامل الخلايا الغدية بس، أو العضلية بس أو النوعين.. والعلاج بيختلف حسب نوع الخلايا اللي في التضخم.