التضخم الحميد للبروستاتا

التضخم الحميد للبروستاتا سبب مهم من أسباب ضيق وانسداد الجزء العلوي من مجرى البول، وده بيسبب احتباس وتجمع للبول في المثانة وصعوبة في عملية التبول، وهي دي أسباب الأعراض اللي بتظهر على المريض واللي بتكون في صورة: 🔸صعوبة التبول اللي بتخلي المريض يضطر يحزق أو يحرن بشدة وده ممكن يسبب نزول دم مع البول 🔸الشعور بإن المثانة لسه ما فضيتش بعد التبول وباستمرار الرغبة في التبول برغم عدم نزول بول 🔸نزول البول في صورة تيار متقطع أو ضعيف برغم الحزق 🔸نزول نقط بول متقطعة لفترة بعد التبول 🔸زيادة مرات التبول وخصوصاً بالليل وأثناء النوم، والإحساس المفاجئ برغبة ملحة في التبول في بعض الأحيان 🔸نزول بول على المريض غصب عنه أو بدون شعوره، وده بسبب امتلاء المثانة بكمية كبيرة 🔸في الحالات الشديدة ممكن يحصل احتباس حاد في البول لمدة طويلة بسبب انقباض العضلة الضامة الداخلية اللي في مخرج المثانة، والاحتباس الحاد ده بيسبب ألم شديد وشعور بعدم الراحة، وممكن المريض يحتاج يركب قسطرة بولية علشان يفك الاحتباس ده.. في بعض العوامل ممكن تساعد على حدوث الاحتباس البولي عند مرضى التضخم الحميد للبروستاتا، ومهم المريض يتجبنها قدر الامكان.. العوامل دي منها: ⚠️ قلة النشاط والحركة ⚠️ برودة الجو ⚠️ الرغبة الجنسية ⚠️ الإصابة بالإمساك ⚠️ بعض الأدوية زي مضادات الحساسية وأدوية البرد اللي فيها مضادات للاحتقان وبخاخات علاج الربو وأدوية تانية ⚠️ تعاطي الكحوليات (الخمور)